Cumprindo co pactado coa Asemblea de Investigadoras de Compostela, o pasado 23 de novembro o Consello de Goberno da USC modificou o regulamento de xestión e uso de espazos da universidade. A través deste cambio, formalizamos o dereito de todas as investigadoras cun vínculo laboral coa USC (predos, posdoc, investigadoras en proxectos, etc.) a dispoñer do equipamento necesario para a realización do seu labor, nomeadamente equipamento informático. Establécese que os decanatos e as direccións dos centros de investigación son responsables da aplicación desta nova norma.

Pese a nos parabenizar por este éxito parcial, cremos que aínda queda moito camiño por percorrer. Neste sentido, desde a AIC entendemos como fundamental:

1. En primeiro lugar, asegurar a implementación deste dereito. Debemos estar atentas e vixiantes ante posibles incumprimentos das norma. Desde a USC existe o compromiso de facer seguimento a través de enquisas. A maiores, é importante que se algunha de nós detecta irregularidades o poña en coñecemento da Asemblea para poder actuar colectivamente.
2. Así mesmo, debemos dar a batalla polo dereito a dispoñer do equipamento necesario para a investigación para todo o persoal investigador, incluídas aquelas persoas que investigan elaborando a súa tese sen contrato—entre o 75 e o 80% das doutorandas da USC.

Onte as nosas representantes no claustro da USC presentaron unha serie de emendas ás Liñas Xerais de Orzamento de 2024 conseguindo que se aprobase o seguinte:

1️⃣ Unha redución do prezo nas cafeterías da USC para toda a comunidade universitaria.
2️⃣ A extensión dos cursos de galego para non galegofalantes do CLM dende o nivel A1 ata o nivel C2.
3️⃣ O compromiso de comezar coa renovación e mellora do Pavillón polideportivo do Campus de Santiago.
4️⃣ O reforzo da unidade de Atención Psicolóxica pasando de 24 sesións semanais a 40.
5️⃣ O compromiso de convocar de forma inminente os contratos de iniciación á investigación do curso 2023-2024 e a súa resolución a principios de 2024 para que non volva darse a situación deste ano.
6️⃣ A convocatoria dos contratos predoutorais propios da USC de 2024 que xa eliminaran nestes orzamentos mais sen especificar o orzamento e número de contratos.

🇵🇸 Finalmente, a raíz dunha proposta da AIC, conseguiuse un posicionamiento da USC en contra do que está a acontecer en Palestina demandando o cesamento dos crimes de guerra, a fin do bloqueo humanitario e a retirada de tropas israelís en Gaza e Cisxordania. Esta declaración debería facerse pública na páxina web da USC.

✊ Estas boas novas reafirman a necesidade de ter representación no claustro e o resto de órganos de representación da USC. Xuntas somos máis fortes!

O luns 12 de decembro ás 17.30h na Aula Magna da Facultade de Matemáticas contaremos con dous relatorios.

En marzo de 2021 os sindicatos maioritarios recibían do Secretario Xeral de Universidades o “Dossier de trabajo para una nueva Ley Orgánica del Sistema Universitario (LOSU)”. Así se iniciaba, aínda co ministro Castells, a reforma da lei orgánica das universidades.

O proceso estivo marcado por unha gran falta de negociación coa parte social. Pasouse dun primeiro anteproxecto de agosto de 2021, a un suposto abandono da reforma da lei co cambio de ministro, a un novo anteproxecto en agosto de 2022.

Polos diferentes borradores da norma apareceron medidas en detrimento da democracia, como o mandato único de 6 anos; ou medidas en prol dunha maior transparencia e igualdade, como comisións externas nos procesos de selección de profesorado para evitar a endogamia; e tamén en detrimento das mesmas, como a eliminación da acreditación a Axudante Doutor. Daniel Cao, compañeiro da AIC e profesor na USC, falaranos ás 17.30h de todo isto, do que cambia e non cambia no último borrador da LOSU. O último anteproxecto atópase agora en proceso de tramitación no Congreso e é probable que vaia a pleno este mes de decembro.

Cada vez con máis frecuencia vemos noticias sobre casos de corrupción na universidades. O caso máis frecuente é o favorecemento dunha candidata “da casa” en favor doutra candidata “externa”. É por iso que unha das esixencias do persoal investigador e universitario cara a dita lei era o deseño dun sistema de selección de persoal máis transparente e libre de corruptelas. Algunhas propostas podemos atopalas na carta aberta da FJI-Precarios ao propio Ministro Subirats: publicación do baremo na convocatoria da praza, elixir os membros da comisión por sorteo e que parte deles sexan externos coa fin de evitar conflitos de intereses, adoptar un modelo único de CV, entre outros.

Disto versará o segundo relatorio, ás 18.30h, onde José Mateos, avogado e profesor asociado de dereito na Universidade de Murcia (UMU), nos falará dende o punto de vista profesional (xa que é avogado defensor de casos deste estilo) e tamén persoal (xa que tristemente viviu un caso nas súas carnes).