Arquivos da etiqueta: nota de prensa

A USC seguirá incumprindo a súa propia normativa laboral

Notas de prensa, , , ,

Anuncia, en cambio, que si cumprirá o EPIPF

Este mércores, 12 de xuño, o Xerente da Universidade de Santiago de Compostela vén de anunciar que cumprirá a lei.

Así, tres meses despois da entrada en vigor do Estatuto do Persoal Investigador Predoutoral en Formación (EPIPF), aprobado por R.D. 103/2019, a USC anuncia que o acatará e que empezará a pagar os salarios mínimos aos que está obrigada, posiblemente na nómina de xullo. É dicir, que aínda haberá que seguir agardando.

Desde a Asemblea de Investigadoras de Compostela xa fomos críticas no seu momento coa redacción final do EPIPF que aprobou o Goberno, pois non recollía algunhas das importantes demandas que o colectivo predoutoral lle tiña trasladado. Logo, ficamos abraiadas ao ver que a USC se negaba a aplicalo cando entrou en vigor. E, agora, estamos profundamente decepcionadas pola oportunidade perdida pola USC, xa que anunciou que se limitará a cumprir só os mínimos aos que entende que lle obriga a lei, mentres segue negándose a atender as nosas demandas, a cumprir a súa propia normativa interna e, incluso, a sentenza xudicial que a condena a pagar a indemnización por extinción de contrato.

A medida anunciada pola USC traduciríase en que algunhas persoas con contrato predoutoral de, por exemplo, 3 ou 4 anos (as duracións máis comúns de contratos vencellados a convocatorias de axudas públicas) estarían cobrando, respectivamente e segundo os mínimos asumidos pola USC na súa interpretación do EPIPF, 4.472,27 € ou 874,64 € menos que as persoas da súa mesma categoría, ás que si se lles está aplicando a normativa interna da USC e si se lles está pagando a indemnización. Todo isto segundo os cálculos feitos coas retribucións mínimas actualmente vixentes para ambas normativas e para a duración total do contrato. É dicir, acatando así o EPIPF, a USC segue incumprindo, segue discriminando e segue aforrando cartos.


 Normativa USC Novo EPIPF Diferenza
Retribucións Ano 1 17.428,76 € 16.127,59 € -1.301.17 €
Retribucións Ano 2 17.428,76 € 16.127,59 € -1.301.17 €
Retribucións Ano 3 17.428,76 € 17.279,56 € -149.20 €
Indemnización Extinción 1.720,72 € 0,00 €* -1.720,72 €
Total 54.007,00 € 49.534,73 € -4.472,27 €

Normativa USC Novo EPIPF Diferenza
Retribucións Ano 1 17.428,76 € 16.127,59 € -1.301.17 €
Retribucións Ano 2 17.428,76 € 16.127,59 € -1.301.17 €
Retribucións Ano 3 17.428,76 € 17.279,56 € -149.20 €
Retribucións Ano 4 17.428,76 € 21.599,45 € 4.170,69 €
Indemnización Extinción 2.293,77 € 0,00 €* -2.293,77 €
Total 72.008,81 € 71.134,17 € -874,64 €

* A USC recorreu a sentenza que a condena a pagala e néganse a facelo.
Cadros: Importes correspondentes ao ano 2019 para a categoría de Investigador/a en Formación

Por que se anuncia entón que “a USC investirá outros 200.000 euros en incrementos salariais” -como puidemos ver publicado en varios medios-?. Pois por dúas razóns: porque a USC non está cumprindo a lei e está pagando menos do que debe a parte do colectivo predoutoral, co conseguinte aforro, e porque ademais, agardando ao mes de xullo fai coincidir esta regularización co pago dos atrasos que lles debe desde o 16 de marzo -data na que entrou en vigor- e coa suba do 0,25% do mes de xullo que tamén está obrigada a facer por lei. Suba esta, dito sexa de paso, que segue negándose a aplicarlle a parte do seu persoal, como vén facendo desde o ano 2016.

O de “outros”, francamente, non sabemos a que vén.

Así as cousas, tras un ano de mandato, o Equipo de Goberno da USC segue negándose a atender as principais demandas do colectivo. E non é que non as aplique, é que non quere nin sequera falar delas nin negocialas. Nin coa AIC nin cos sindicatos.

Un ano no que a USC nin fixo nada ao respecto nin mudou de actitude. Un ano perdido.

Por todo isto, non nos queda outra que seguir loitando nos #MartesNegros #PorUnhaUSCDigna e explorar novas vías de mobilización e protesta.

[Última Actualización 17/06/2019]: Actualización de retribucións mínimas de acordo ao novo EPIPF debido á publicación do IV Convenio colectivo unico para o persoal laboral da Administración Xeral do Estado.

Versión en castellano

Páxinas: 1 2

A USC fai negocio coa precarización

Notas de prensa, , , , , ,

A Valedora do Pobo desmonta as escusas do Equipo de Goberno

© Valedor do Pobo

A Asemblea de Investigadoras de Compostela (AIC) acaba de recibir da Comisión da Transparencia de Galicia -adscrita ao Valedor do Pobo- información que desmonta as escusas que o Equipo de Goberno da USC emprega para tratar de xustificar a situación de discriminación á que ten sometido a parte do persoal de investigación: a suposta falta de fondos.

Esta comisión estima a reclamación presentada pola AIC contra o silencio administrativo co que a Consellería de Cultura, Educación e Ordenación Universitaria tratara de dar por resolta unha solicitude de información, presentada no Portal de Transparencia da Xunta de Galicia, referente ao financiamento que recibe a Universidade de Santiago de Compostela no Plan Galego de Financiamento Universitario 2016-2020 por captación de talento investigador, produción científica, teses de doutoramento defendidas, etc. das persoas en etapa predoutoral. En concreto, preguntábase canto recibe a USC da parte variable dos indicadores relacionados directamente coas persoas investigadoras predoutorais e a que se destinan estes recursos.

Hai que lembrar que as persoas deste colectivo xa teñen cubertos os seus custes salariais polas axudas das correspondentes convocatorias públicas. Polo que estes son fondos extra percibidos pola USC a maiores, polo simple feito de ter captado a estas persoas e polo traballo que elas realizan (produción científica, teses, etc.).

Na súa resposta á Comisión da Transparencia, a Consellería trata de xustificar a dificultade -ou incluso imposibilidade- de obter toda a información solicitada, pero indica que “Tras realizar un traballo de elaboración, a Consellería pode obter certa información desagregada no indicador PGFU-02 (Captación de talento investigador), advertindo que este dato está referido unicamente a aqueles predoutorais captados en convocatorias ou programas competitivos e non a todos os matriculados nas universidades. De acordo co anterior, no cómputo para o plan no ano 2017 considérase que os ingresos obtidos pola Universidade de Santiago de Compostela para ese indicador son 1.356.810 €, dos 6.954.436 € asignados a dita Universidade por ese indicador”.

É dicir, mentres se lles negaba a estas persoas unha suba salarial de só 11,73 € ao mes -alegando non ter diñeiro-, a USC percibía por elas máis de 1,3 millóns de euros extra só por unha parte dun dos indicadores dese ano. É indignante.

Á pregunta de a que destina a USC estes recursos, a Consellería só responde que “no caso de que puideran determinarse de maneira exacta, sería un dato que tería que solicitarse á Universidade de Santiago de Compostela”.

Contesta a isto a Comisión da Transparencia resolvendo “Instar así mesmo á Consellería a que remita, de conformidade co disposto no artigo 19.1 da Lei 19/2013, a solicitude do interesado á Universidade de Santiago de Compostela a efectos de que esta institución lle informe sobre o destino dos referidos recursos”.

Seguimos agardando a que tanto a Consellería como a USC nos remitan a información completa para ver en canto aumentan estas cantidades pero, só coas xa coñecidas, damos por totalmente desmontadas as escusas que o actual Equipo de Goberno pon para non solucionar este problema. A conclusión é clara: a USC gaña diñeiro precarizando a estas persoas.

Reafirmamos con isto a necesidade de facer pública esta situación de discriminación, desprezo e malgasto. Situación coa que nos empurran a ter que seguir protestando e mobilizándonos.

As promesas incumpridas, as mentiras e as falsidades combátense con loita, datos e verdades.

Versión en castellano

Páxinas: 1 2

O persoal de investigación da USC iniciará mobilizacións e accións de protesta

Notas de prensa, , , , , ,

Así o acordaron en asemblea en resposta á discriminación e desprezo que sofren por parte do Equipo de Goberno

Investigadoras nunha mobilización en 2017.

A Asemblea de Investigadoras de Compostela (AIC) acordou por unanimidade na súa última asemblea -celebrada o 29 de xaneiro- iniciar mobilizacións e diferentes accións de protesta. Decisión que nos obrigou a adoptar o actual Equipo de Goberno da Universidade de Santiago de Compostela, que segue facendo oídos xordos ás reiteradas peticións realizadas para tratar de solucionar a situación de discriminación e inxustiza que sofre o colectivo.

O que pedimos é que se poña fin á discriminación á que se vén sometendo a unha parte do persoal de investigación desde 2016, cando se lle empezou a pagar por debaixo do salario mínimo que fixa a normativa, e a quen tamén se lle negan as subidas salariais -que si ten o resto de persoal da USC- e se lle deixou de aboar a indemnización por extinción de contrato. Só pedimos que tódalas persoas que teñen a mesma categoría profesional teñan garantidas as mesmas condicións laborais mínimas que xa recolle a normativa da USC.

Así, por exemplo, para unha investigadora FPU/FPI a diferenza entre o que percibe (1.173,00 €/mes) e o que figura na táboa de salarios mínimos actualizada (1.244,91 €/mes) supera xa os 1.000 euros anuais. Dándose ademais por primeira vez a circunstancia de que un axudante de apoio á investigación percibe xa un salario mínimo (1.193,97 €/mes) superior ao das propias investigadoras destas convocatorias. Algo inaudito.

Acabar con esta discriminación foi a petición que se lle trasladou ao Xerente, Javier Ferreira, e á Vicexerenta de Persoal, Pilar Martínez, nunha xuntanza mantida con eles o 7 de decembro, e que rematou coa solicitude do xerente de que lle remitísemos por escrito as nosas demandas -cousa que fixemos- e co seu compromiso de levalas e tratalas na mesa de negociación cos sindicatos.

Disto informamos tamén a todos os sindicatos presentes na citada mesa (CCOO, CIG, CSIF e UGT) en xuntanzas bilaterais mantidas posteriormente con todos eles, e nas que manifestaron estar de acordo coas nosas reivindicacións e coa necesidade de solucionalo.

Tras agardar a que o xerente tomase a iniciativa, foron os propios sindicatos os que se dirixiron a el -o 21 de decembro- para solicitar formalmente que convocase esa reunión, pero, e a pesar de reiterarlle a petición posteriormente, o xerente segue sen convocala.

Pola súa parte o Reitor, Antonio López, segue sen responder ás peticións que se lle fan desde a AIC para reunirnos con el, compromiso que adquiriu tanto durante a campaña electoral como no claustro do 29 de novembro tras unha intervención dun representante da AIC. E o Vicerreitor de Investigación e Innovación parece que nin está nin se lle espera.

Mentres, ante a inacción do Equipo de Goberno, as demandas contra a USC seguen aumentando. Polo que non entendemos como é posible que prefiran seguir malgastando diñeiro público en pagar honorarios de avogados, indemnizacións e custas xudiciais en vez de investilos en investigación. Sobre todo, cando solucionar esta situación depende única e exclusivamente do Equipo de Goberno. É algo realmente inexplicable.

Por iso consideramos necesario alzar a voz e facer pública esta situación de discriminación, desprezo e malgasto, para que toda a Comunidade Universitaria, e toda a sociedade, coñeza o que está pasando.

Versión en castellano

Páxinas: 1 2

O persoal de investigación da USC amósase preocupado pola súa situación e polo futuro da institución

Notas de prensa, , , ,

Os compromisos adquiridos polo novo reitor parecen caer no esquecemento

Science the real superhero!
(CC) By Molly Adams

A ‘Asemblea de Investigadoras de Compostela’ (AIC), da que forman parte diferentes colectivos do persoal de investigación da  Universidade de Santiago de Compostela (investigador, técnico e de xestión), acordou na súa última asemblea, celebrada o pasado 29 de outubro, facer pública a súa preocupación pola falta de resposta por parte do novo equipo de goberno da USC para dar solución á súa precaria situación.

Tras reunirnos durante a campaña electoral co entón candidato, Antonio López, este comprometeuse a manter encontros regulares coa AIC, en caso de ser elixido Reitor, para buscar solucións aos problemas que lle trasladabamos, chegando mesmo a incorporar algunhas das nosas demandas á súa campaña e a comprometerse publicamente a solucionar urxentemente a nosa situación.

Xa como Reitor, Antonio López, no seu discurso no acto de apertura do curso 2018/2019 dixo que “consideramos da máxima relevancia e urxencia avanzar na regulación e mellora das condicións laborais do importantísimo número de traballadores contratados con cargo ao capítulo VI para atender necesidades de investigación (arredor de 1000 persoas)”. Nesa mesma liña, o novo Xerente, Javier  Ferreira, recoñecía nunha entrevista publicada o 29 de xullo en La Voz de Galicia “ter 900 persoas contratadas con cargo a proxectos de forma precaria”.

Consecuentes cos compromisos adquiridos e as posteriores declaracións realizadas, solicitamos no mes de setembro reunirnos co novo  Reitor, sendo convidados pola Reitoría a que nos reunísemos, no seu lugar, co Vicerreitor de Investigación e Innovación, Vicente Pérez. Nese encontro, celebrado o pasado 5 de outubro, lembráronselle as necesidades máis urxentes relativas a condicións laborais, demandas que o Vicerreitor se comprometeu a estudar en profundidade e a buscarlles unha pronta solución, a cal nos sería transmitida no prazo dunha semana. Ante a falta de resposta, e tras reiterar a petición, só obtivemos silencio.

Desde a AIC queremos manifestar o noso malestar por esta falta de resposta e a nosa preocupación ante unha situación que consideramos insostible. Descoñecemos se o novo equipo de goberno non sabe, ou simplemente non quere, solucionar os problemas existentes.

Vemos con preocupación a situación na que se atopa a investigación na USC debido ás condicións de inestabilidade e precariedade na que centos de persoas teñen que traballar diariamente.

Vemos con preocupación a xestión que se fai dos recursos económicos dedicados a investigación na USC, a desigual distribución dos mesmos e as inxustizas que isto provoca. É un dato contrastable que a USC inviste máis diñeiro en pagar indemnizacións e costas xudiciais por demandas laborais de contratos irregulares e en fraude de lei, do que inviste en sufragar algúns proxectos de investigación.

Vemos con gran preocupación como a USC non respecta a Carta Europea do Persoal Investigador, o Código de Conduta para a Contratación do Persoal Investigador e outros compromisos de obrigado cumprimento para seguir mantendo o selo HR de Excelencia en Investigación, arriscándose a perdelo e, con iso, a ver reducidas as opcións de captación de talento investigador e de fondos europeos para o seu financiamento.

Por este motivo, desde a AIC queremos facer un chamamento público aos sectores implicados da Comunidade Universitaria: ás persoas que están en precario, con ou sen contrato, a unirse e reclamar melloras urxentes nos procesos de contratación e nas súas condicións de traballo; aos e ás Investigadoras Principais (IPs) de proxectos e grupos de investigación, a corresponsabilizarse e reclamar respecto e dignidade para as persoas que traballan ao seu cargo; e por último, ao equipo de goberno, a deixar de mirar para outro lado, a dialogar e a buscar unha solución definitiva coa que erradicar a precariedade da nosa Universidade.

Desde a AIC queremos amosar unha vez máis o noso firme compromiso coa defensa das persoas ás que representamos e coa importancia que damos á investigación en todas as áreas de coñecemento nas que desenvolven o seu labor. Cremos que unha investigación de calidade, que sexa útil para a sociedade, só se pode lograr cando se leva a cabo nunha contorna e cunhas condicións adecuadas. É obrigación da USC velar, con urxencia, polo benestar e seguridade de todas as persoas que forman parte da institución.