A universidade e a representación sindical firman un acordo para recoñecer o dereito a percibir complementos por antigüidade do persoal investigador
Onte, 21 de setembro, a representación sindical e máis o equipo de goberno asinaron o acordo que pon fin á discriminación do persoal investigador pre e posdoutoral (convocatorias públicas) e persoal contratado a cargo de proxectos en canto ao complemento por antigüidade (trienios).
Nos vindeiros días a universidade publicará o procedemento e formularios a seguir para solicitar este dereito. Aquelas persoas que teñan demandado o seu dereito ao complemento por antigüidade en sede xudicial se poñan en contacto coa súa defensa antes de realizar trámite algún.
Como contabamos en xullo, que a USC acepte aboar os trienios ao persoal máis precarizado é froito do longo traballo que viñemos desenvolvendo dende esta asociación ao longo dos 3 anos de existencia: mobilizacións, xuntanzas, moitas horas de dedicación a preparar información e, o máis importante, a todas as demandas individuais presentadas, especialmente á única que de momento foi xa a xuízo (na USC, pos temos réplicas na UVigo) e que abriu esta xanela para todas.
A loita por unhas condicións dignas para as persoas investigadoras atravesa constantemente o percorrido da AIC. Xa hai 4 anos, denunciabamos o retraso nas convocatorias de contratos predoutorais da Xunta de Galicia1. Sinalabamos daquela que tales retrasos daban lugar a un proceso de segregación económica na investigación, propiciando “un importante abandono por parte das persoas que non poden sufragar os seus gastos e a precariedade daquelas que subsisten con escasos medios”, pois ao longo dos anos, a porcentaxe de investigadoras predoutorais da USC que obteñen un contrato a cargo destas convocatorias non chega ao 2%.
Pero non só amosaron ser insuficientes os contratos a cargo das convoctorias predoutorais da Xunta de Galicia. Desde que hai rexistro, a cantidade de persoal predoutoral que non dispón de ningún tipo de contrato na universidade supera o 70%. A realización dunha tese de doutoramento sen financiamento parece ser norma xeral dentro da USC.
Tras anos de mobilización e traballo constante, no último debate orzamentario a AIC logrou que fosen aprobadas de novo partidas de gasto destinadas a financiar contratos predoutorais propios na USC. Trátase, en termos xerais, dun pequeno paso no camiño que alivia de maneira parcial a desastrosa situación herdada tras décadas de política universitaria infrafinanciada e baseada en criterios empresariais. Así mesmo, desde a AIC entendemos que debe tratarse dun paso cara unha investigación máis democrática, onde o financiamento da mesma sexa decidido baixo criterios académicos e non atendendo a se unha liña de investigación é máis ou menos rendible a curto prazo no mercado. É por iso que, na proposta realizada, entendemos como necesario compensar os nesgos observados nas convocatorias dos programas de contratación do Goberno central e a Xunta de Galicia cun programa que poida favorecer ás áreas de coñecemento e liñas de investigación estruturalmente máis prexudicadas.
Tras a aprobación por unanimidade no Claustro destas axudas ás contratacións, faise necesaria a aprobación definitiva da súa convocatoria por parte do Equipo de Goberno. Neste sentido, desde a AIC observamos con preocupación como os tempos para facer efectiva esta conquista están a dilatarse, poñendo en perigo que os contratos poidan ser concretados ao comezo do vindeiro curso. Entendendo as dificultades técnicas que poidan ter que afrontar os diferentes servizos da universidade, sinalamos que o diálogo sobre o fondo da convocatoria está na actualidade paralizado. Así mesmo, preocúpanos a posibilidade de que finalmente os criterios para a adxudicación destes contratos non respondan ao espírito da proposta feita pola AIC na cal primaban, por enriba de todo, os criterios de carácter académico. A celeridade mostrada para a convocatoria de contratos de investigadoras distinguidas debe trasladarse tamén ao ámbito da investigación predoutoral.
É por iso que desde a Asemblea de Investigadoras de Compostela entendemos que debemos continuar alerta e firmes para lograr na USC unha convocatoria de contratos predoutorais que responda a criterios científicos. Así mesmo, continuando co fío aberto na campaña #PorUnhaInvestigaciónDemocrática, seguiremos loitando pola mellora das condicións materiais das investigadoras. A participación, o traballo constante e a mobilización son chave para a conquista de novos dereitos e na construción dunha Universidade Digna. Mans á obra.
Este mércores, 12
de xuño, o Xerente da Universidade de Santiago de Compostela vén de
anunciar que cumprirá a lei.
Así, tres meses
despois da entrada en vigor do Estatuto do Persoal Investigador
Predoutoral en Formación (EPIPF), aprobado por R.D. 103/2019, a USC
anuncia que o acatará e que empezará a pagar os salarios mínimos
aos que está obrigada, posiblemente na nómina de xullo. É dicir,
que aínda haberá que seguir agardando.
Desde a Asemblea de
Investigadoras de Compostela xa fomos críticas no seu momento coa
redacción final do EPIPF que aprobou o Goberno, pois non recollía
algunhas das importantes demandas que o colectivo predoutoral lle
tiña trasladado. Logo, ficamos abraiadas ao ver que a USC se negaba
a aplicalo cando entrou en vigor. E, agora, estamos profundamente
decepcionadas pola oportunidade perdida pola USC, xa que anunciou que
se limitará a cumprir só os mínimos aos que entende que lle obriga
a lei, mentres segue negándose a atender as nosas demandas, a
cumprir a súa propia normativa interna e, incluso, a sentenza
xudicial que a condena a pagar a indemnización por extinción de
contrato.
A medida anunciada pola USC traduciríase en que algunhas persoas con contrato predoutoral de, por exemplo, 3 ou 4 anos (as duracións máis comúns de contratos vencellados a convocatorias de axudas públicas) estarían cobrando, respectivamente e segundo os mínimos asumidos pola USC na súa interpretación do EPIPF, 4.472,27 € ou 874,64 € menos que as persoas da súa mesma categoría, ás que si se lles está aplicando a normativa interna da USC e si se lles está pagando a indemnización. Todo isto segundo os cálculos feitos coas retribucións mínimas actualmente vixentes para ambas normativas e para a duración total do contrato. É dicir, acatando así o EPIPF, a USC segue incumprindo, segue discriminando e segue aforrando cartos.
Normativa USC
Novo EPIPF
Diferenza
Retribucións Ano 1
17.428,76 €
16.127,59 €
-1.301.17 €
Retribucións Ano 2
17.428,76 €
16.127,59 €
-1.301.17 €
Retribucións Ano 3
17.428,76 €
17.279,56 €
-149.20 €
Indemnización Extinción
1.720,72 €
0,00 €*
-1.720,72 €
Total
54.007,00 €
49.534,73 €
-4.472,27 €
Normativa USC
Novo EPIPF
Diferenza
Retribucións Ano 1
17.428,76 €
16.127,59 €
-1.301.17 €
Retribucións Ano 2
17.428,76 €
16.127,59 €
-1.301.17 €
Retribucións Ano 3
17.428,76 €
17.279,56 €
-149.20 €
Retribucións Ano 4
17.428,76 €
21.599,45 €
4.170,69 €
Indemnización Extinción
2.293,77 €
0,00 €*
-2.293,77 €
Total
72.008,81 €
71.134,17 €
-874,64 €
* A USC recorreu a sentenza que a condena a pagala e néganse a facelo. Cadros: Importes correspondentes ao ano 2019 para a categoría de Investigador/a en Formación
Por que se anuncia entón que “a USC investirá outros 200.000 euros en incrementos salariais” -como puidemos ver publicado en varios medios-?. Pois por dúas razóns: porque a USC non está cumprindo a lei e está pagando menos do que debe a parte do colectivo predoutoral, co conseguinte aforro, e porque ademais, agardando ao mes de xullo fai coincidir esta regularización co pago dos atrasos que lles debe desde o 16 de marzo -data na que entrou en vigor- e coa suba do 0,25% do mes de xullo que tamén está obrigada a facer por lei. Suba esta, dito sexa de paso, que segue negándose a aplicarlle a parte do seu persoal, como vén facendo desde o ano 2016.
O de “outros”,
francamente, non sabemos a que vén.
Así as cousas, tras
un ano de mandato, o Equipo de Goberno da USC segue negándose a
atender as principais demandas do colectivo. E non é que non as
aplique, é que non quere nin sequera falar delas nin negocialas. Nin
coa AIC nin cos sindicatos.
Un ano no que a USC
nin fixo nada ao respecto nin mudou de actitude. Un ano perdido.
Por todo isto, non nos queda outra que seguir loitando nos #MartesNegros #PorUnhaUSCDigna e explorar novas vías de mobilización e protesta.
A
Asemblea de Investigadoras de Compostela (AIC) acaba de recibir da
Comisión da Transparencia de Galicia -adscrita ao Valedor do Pobo-
información que desmonta as escusas que o Equipo de Goberno da USC
emprega para tratar de xustificar a situación de discriminación á
que ten sometido a parte do persoal de investigación: a suposta
falta de fondos.
Esta
comisión estima a reclamación presentada pola AIC contra o silencio
administrativo co que a Consellería de Cultura, Educación e
Ordenación Universitaria tratara de dar por resolta unha solicitude
de información, presentada no Portal de Transparencia da Xunta de
Galicia, referente ao financiamento que recibe a Universidade de
Santiago de Compostela no Plan Galego de Financiamento Universitario
2016-2020 por captación de talento investigador, produción
científica, teses de doutoramento defendidas, etc. das persoas en
etapa predoutoral. En concreto, preguntábase canto recibe a USC da
parte variable dos indicadores relacionados directamente coas persoas
investigadoras predoutorais e a que se destinan estes recursos.
Hai
que lembrar que as persoas deste colectivo xa teñen cubertos os seus
custes salariais polas axudas das correspondentes convocatorias
públicas. Polo que estes son fondos extra percibidos pola USC a
maiores, polo simple feito de ter captado a estas persoas e polo
traballo que elas realizan (produción científica, teses, etc.).
Na
súa resposta á Comisión da Transparencia, a Consellería trata de
xustificar a dificultade -ou incluso imposibilidade- de obter toda a
información solicitada, pero indica que “Tras realizar un traballo
de elaboración, a Consellería pode obter certa información
desagregada no indicador PGFU-02 (Captación de talento
investigador), advertindo que este dato está referido unicamente a
aqueles predoutorais captados en convocatorias ou programas
competitivos e non a todos os matriculados nas universidades. De
acordo co anterior, no cómputo para o plan no ano 2017 considérase
que os ingresos obtidos pola Universidade de Santiago de Compostela
para ese indicador son 1.356.810 €, dos 6.954.436 € asignados a
dita Universidade por ese indicador”.
É
dicir, mentres se lles negaba a estas persoas unha suba salarial de
só 11,73 € ao mes -alegando non ter diñeiro-, a USC percibía por
elas máis de 1,3 millóns de euros extra só por unha parte dun dos
indicadores dese ano. É indignante.
Á
pregunta de a que destina a USC estes recursos, a Consellería só
responde que “no caso de que puideran determinarse de maneira
exacta, sería un dato que tería que solicitarse á Universidade de
Santiago de Compostela”.
Contesta a isto a Comisión da Transparencia resolvendo “Instar así
mesmo á Consellería a que remita, de conformidade co disposto no
artigo 19.1 da Lei 19/2013, a solicitude do interesado á
Universidade de Santiago de Compostela a efectos de que esta
institución lle informe sobre o destino dos referidos recursos”.
Seguimos
agardando a que tanto a Consellería como a USC nos remitan a
información completa para ver en canto aumentan estas cantidades
pero, só coas xa coñecidas, damos por totalmente desmontadas as
escusas que o actual Equipo de Goberno pon para non solucionar este
problema. A conclusión é clara: a USC gaña diñeiro precarizando a
estas persoas.
Reafirmamos
con isto a necesidade de facer pública esta situación de
discriminación, desprezo e malgasto. Situación coa que nos empurran
a ter que seguir protestando e mobilizándonos.
As promesas incumpridas, as mentiras e as falsidades combátense con loita, datos e verdades.
Acabamos de realizar o primeiro pedido de camisolas #PorUnhaUSCDigna. Nada menos que 118 camisolas💥! Grazas pola colaboración e as doazóns!
Debido ao éxito e que non parades de preguntarnos se aínda se poden conseguir, abrimos un segundo período para poder conseguilas. O procedemento é o mesmo que da outra vez:
Canto custa?
O prezo dunha camisola é o custo de fabricación, 5€. A asociación non gaña nada. Mais convidámoste a facer unha pequena doazón de 1€ para cubrir gastos de impresión de carteis e material que está tendo a asociación.
Como talla?
Podes comprobar que talla che corresponde clickando en “Calculate size” (esquina superior dereita) en https://www.roly.es/model_CA6502
Como solicitar unha camisola?
Pagamento vía PayPal. Non fai falla ter conta en Paypal. Calquera persoa cunha tarxeta de débito ou crédito pode pagar. A cantidade recadada será pública así como os pagamentos. Non se amosará ningún dato persoal.
Indicar a talla neste formulario.Debes indicarnos o teu nome, dirección de correo, campus e as tallas das camisolas mercadas para poder entregarchas.
Sobra dicir que non fai falla ser asociada para mercar unha camisola. Podedes mercar as que queirades e para quen queirades.
Exemplos
Quero 2 camisolas, como fago? Ingresa 10€ vía PayPal e indica no formulario que 2 tallas precisas.
Quero 3 camisolas e ademais quero colaborar cos gastos que está tendo a asociación, como fago? Ingresa 16€ (15€ de camisolas + 1€ de colaboración) vía Paypal e indica no formulario que 3 tallas precisas.
Prazo
Non hai prazo como tal. O pedido realizarase cando reunamos unhas unidades mínimas, sempre na maior brevidade posible. Non te preocupes, cando estean listas recibirás un correo cos puntos de recollida.
Ola! A páxina web da Asociación Asemblea de Investigadoras de Compostela emprega cookies só para fins estatísticos das visitas que recibimos así como para manexar a sesión de usuario.De acordoRexeitar cookies de terceiros
